مها أحمد تفتح النار على نجمين كبيرين شاركا بمسلسل برمضان "كانوا مخدماتية للأستاذه" وتصف أحدهم بالندل

الفنانة مها أحمد (أرشيفية)

---

وجهت الفنانة مها أحمد رسالة شديدة اللهجة إلى أشخاص من الوسط الفني لم تسمهم، موضحة أنها تعرضت لمواقف محرجه منهم مشبه أحدهم بـ«الندل»، مشيرة إلى أن هؤلاء الفنانين شاركوا سويا بمسلسل تم عرضه خلال شهر رمضان 2021 قائلة: «نجمين عملوا مسلسل واتنجمت عليهم بنوته لسه ألف باء تمثيل واديتهم على قفاهم».

وكتبت «مها» عبر صفحتها الرسمية بموقع «فيسبوك»: «عوضي على الله دى الجمله اللى دايما بقولها لما اتصدم فاشخاص، الحكايه ياساده نجمين عملوا مسلسل واتنجمت عليهم بنوته لسه الف باء تمثيل واديتهم على قفاهم وركبت عليهم إلى ان اصبحت بطلة المسلسل وبطلة الدعايه للمسلسل وهما راضيين رغم ان طول عمرهم مبيعملوش كده مع أي زميله لهم اقربها انا».

موضحة: «النجم الاولانى بينى وبينه عيش وملح وزماله رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتداءه المفروض انه عارف قيمتى الفنيه وعارف انى اضافه له اتهرب منى وموقفش جنبى وباعنى رغم ان الكل عارف انى زى اخته (ندل)».

واضافت: «أما التانى كان فبداياته يتمنى يسلم عليا ويقولى يا أستاذه، نزلت من نفسى وقلتله مش هنشتغل مع بعض ما هى الحوجه مره رد وقالى الدور بينادى صاحبه طبعا محكلكوش قد ايه ندمت نفسى وعشت أسود أيام حياتى عياط واكتئاب وقلت عوضى عليك يارب».

واستكملت :«تمر الأيام والاتنين يعلو ويتجمعوا مع بعض في مسلسل واحد ( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه)».

واختتمت :«يمهل ولا يهمل ابدوا من جديد يا اوفر تمثيل ياللى مبتقروش ياكمبارس جنب النجمه. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ) .
يارب متحوجنا لحد حتى ولو كان أقرب الناس لينا».

أخبار مُتعلقة