أكتشف أهم أعطال سيارتك
الخميس ٠٤ / مايو / ٢٠١٧ 08:29 ص
نائل نبيل
4954
مشاركة
z
عزيزي القارئ أقدم لحضراتكم أهم المعلومات المتعلقة بأهم وأشهر العيوب والأعطال التي قد تتعرض لها أثناء السير بالسيارة.
فهو ملخص معلوماتي يضم غالبية العيوب التي قد تحدث في السيارة، وتلك المعلومات تتيح لحضراتكم كشف العيب والتعرف علية بدقة، حتي تتمكن بسهولة ويسر التعامل معة وتحديدة بدقة كخطوة أولي تيسر علي حضراتكم إصلاح هذا العطل عند الفني المختص.
- لما تسمع صوت عالي من تحت الموتور وضعف في
السحب، يبقى هناك كسر أو تنفيس في زور الشكمان.
- لما تلاقي في عربيتك هزة مع الفرامل، تبقى عربيتك
عاوزة تغيير طنابير، والطنابير جمع طنبورة وهي الدائرة التي تثبت فيها عجلات السيارة وتيل الفرامل.
- لما العربية تحدف في أي تجاه، تبقى عربيتك عايزة ظبط زوايا.
- لما تلاقي دواسة الفرامل محجرة، تبقي عربيتك عاوزة "سيرفو"، «والسيرفو هو موتور مجهز بدائرة إليكترونية للتحكم بدقة في تجاه دوران عامود الموتور ووضعة مع علبة التروس».
- لما يكون في أستهلاك البنزين عالي، تبقي عربيتك عايزة تغيير حاجة من دول "حساس الشكمان - كابلات الإنجيكشن - سلك البوجيهات - البوجيهات".
- لما تلاقى في عربيتك هزة قبل ما توصل لسرعة ١٠٠ كيلومتر/ساعة، تبقي عربيتك عايزة ترصيص أمامي.
- لما تلاقي في عربيتك هزة بعد سرعة ١٠٠ كيلومتر ساعة، تبقي عربيتك عايزة ترصيص خلفي، «والترصيص هو تركيب قطع من الرصاص بأوزان معينة بعد القياس لضبط إتزان العجل».
- لما تسمع صوت ترقعة مع لف الدريكسيون والعربية واقفة، تبقى عربيتك عايزة تغيير أسكترا، «والاسكترا هي ترس صغير راكب علي جريدة مسننة في علبة الدريكسيون».
- لما تلاقي عربيتك بتسخن أوي، يبقى الرادياتير فاضي، «وأول حاجة تعملها تبطل العربية ومتشغلهاش غير بعد ساعتين ثم تحط ليها ماء ولازم تعرف سبب فراغ الرادياتير».
- لما تلاقي الجنط سخن وعلية هباب، يبقي تيل الفرامل فيه مشكلة.
- لما تلاقي كهرباء العربية بتفصل وترجع تاني، تبقي عربيتك عايزة أواطيش بطارية، «و اواطيش البطارية هي الأجزاء التي تمسك قطبي البطارية».
- لما تحس إن عربيتك مفككة من تحت، تبقى عربيتك عايزة تربيط عفشة، «وتربيط العفشة هو ربط كل المسامير والصواميل الموجودة في العفشة».
- لما تلاقي في مياة الرادياتير ريم زيت بني، تبقي عربيتك جابت جوان وش سلندر، «وجوان وش السلندر هو الجزء المسئول عن فصل دلئرة تبريد الموتور عن زيت الموتور».
- لما تلاقي العربية بتعوم فوق وتحت من الخلف، تبقي عربيتك عايزة جلب مقصات أو مساعدين خلفي.
- لما تسمع خبطة أو هزة وأنت بتنقل الفيتيس، يبقي عربيتك عايزة تغيير كبالن داخلية.
- لما تلاقي عربيتك تكون مكتومة والسحب فيها ضعيف، تبقى عربيتك عايزة تنظيف الكربراتير أو كابلات الإنجيكشن، «والكربراتير هو الجزء المسئول عن ضخ البنزين مع الهواء للموتور وبعض السيارات يوجد بها إنجيكشن وهي كابلات تقوم بنفس الدور.
- لما تلاقي في عربيتك رعشة مستمرة وأنت ماشي ببطئ، يبقي عربيتك عايزة قواعد موتور، «وقواعد الموتور هي أجزاء ميكانيكية هي مخصصة لجلوس الموتور عليها».
- لما تسمع صوت تخبيط في علبة صاج، يبقى فحم علبة البيئة عايز يتغير.
- لما عربيتك تبطل منك وأنت ماشي بعد ما تنتش كتير، يبقى عربيتك عايزة تغيير فلتر بنزين.
- لما تسمع صوت تزييق في الملفات والدريكسيون تقيل، يبقى عربيتك عايزة تغيير البطاحات، «والبطاحات موجودة فوق المساعدين الأماميين بالعربية».
- لما تلاقي غطاء زيت الموتور علية طحينة، تبقي عربيتك جابت جوان وش سلندر، «وجوان وش السلندر هو الجزء المسئول عن فصل دائرة تبريد الموتور عن زيت الموتور».
- لما تلاقي الفيتيس تقيل في الحركة وبيزيق، تبقي عربيتك عايزة تغيير زيت الفيتيس، «بعض السيارات تحتاج لتغيير زيت الفيتيس في الصيف وفي الشتاء».
- لما تلاقى طقطة في عربيتك أثناء الملفات، يبقي عربيتك عايزة تغيير كبالن.
- لما تسمع صوت عالي من تحت الكنبة وضعف في السحب، يبقي في كسر في الشكمان.
- لما الدريكسيون ميرجعش لوضعة بعد الملفات، يبقي عربيتك عايزة تغيير صليبة، «والصليبة هي عبارة عن وصلة بين عامودين الدفع».
1706225524jpeg)
1705430817jpeg)
